ورقصت في الشارع وقلت بقينا أحرار يا بيه
وأنت أصلاً محدش قالك حرية يعني أيه
وأن الحرية مش بس حقك اللي تفضل تدور عليه
وبعدين تنسي واجبك واللي عليك ماتفكرش فيه
وترجع بعديها تستغرب البلد ماتغيرتش ليه
طب أسمحلي أقولك يا سيدي من يوم الثورة عملت ايه
عملت بأسم الثورة كشك عشان تبيع سجاير
ولزقت ستيكر الشهدا بتوع 25 يناير
اللي الفكيك اكتشف أنهم ماتوا في أحداث يناير
وعالأرض الزراعية قلت فرصة وبنيت عماير
وعملت للثورة لحاف ومش بعيد تعمل ستاير
وكأن الثورة قامت لأجل الفلوس مش للضماير
كأنك لبست بنطلون ونسيت تقفل الزراير
بعد الثورة أنت قلت كلام كتير مية مية
قلت البلد دي بلدي وهشيلها جوة عينية
وعشانها هتغير عشان مصر البهية
لكن كانت المفاجأة أن أخلاقك هية هية
وكلها كام يوم ورجعت ريما لعادتها الأولانية
وبقيت تشكي من البلطجة وأحنا كلنا بلطجية
أصل أحنا أحسن ناس تصقف وأجدع مطبلاتية
تكونش فاكر الفهلوة هتاخدك للعالمية؟
ده مفيش بلد بتتقدم وأغلب سكانها فهلوية
ده أحنا عشان نتقدم عايزين عزيمة قوية
وأتفرج عاليابان وشوف خيبتك القوية
يضربها نووي، اعصار، بركان وبرده واقفة عفية
واحنا بلدنا تولع عشان عيل عاكس ولية
آه لو تبدأ بنفسك بشوية أحساس بالمسؤلية
واللي بيقولك الكلام ده مش واحد من الفلول
صدقني أنا كنت جنبك جوة الميدان مسحول
وكنت بعلو صوتي بصرخ معاك وبقول
أرحل ياللي ظلمك عدي كل العقول
يمكن أكون أنا ساذج، يمكن أكون مخبول
بس أن أحنا نظلم نفسنا، أهو ده اللي مش مقبول
ليست هناك تعليقات:
إرسال تعليق